மரங்களுக்கடியில் சங்கடங்கள் சலசலக்கும்.
முக்கியப் பாத்திரத்தை பாலித்தீன் பை ஏற்றுநடிக்க
செயற்கை நாடகமொன்று
செலவில்லாமல் அரங்கேறுகிறது.
நாகரிகம் என்ற பேரில் நிர்வாணத்தை நோக்கி நகரும் ஆடைகள்-
எம் டிவியிலும், அடல்ட்ஸ் ஒன்லியிலும்.
தொலைக்காட்சிகளில்
ஆபாசக் காட்சிகளை
அரசாங்கம்
உன்னிப்பாக கவனித்து வருகிறது- செய்தி.
வீட்டில் வளரும் நாய்களுக்கு
விருந்தாளிகளுக்கும்
விரோதிகளுக்கும்
வித்தியாசம் தெரியாமல் போய்விட்டது.
காலிங் பெல்கள்கண்ணீர் விட்டன-
கதவுகள் தட்டப் படுவது,கம்ப்யூட்டர் சுட்டிகளால்...
ஈ மெயில் தபால்காரர் எந்த வீட்டில் தண்ணீர் கேட்பார்?
தண்ணீர்த் தளம் ஏதேனும் தனியே இருக்குமோ?
துக்கங்கள் கூட
தொலைபேசியில் அழ படுகையில்
வந்தாலும் வரலாம்
இணையத்தில் ஈமைக்கிரியை.
அன்டார்டிகாவின் தலை மேல்
அளக்க முடியா ஓசோன் சொட்டை.
-இயற்கை பிரிட்ஜின் தலையில் எந்தத் தைலம் தேய்க்கலாம்?
க்ளோனிங் முறையில்
கார்பன் காப்பிகளை வடிக்கத் தெரிந்த நீ,
எச் ஐ வீ என்றால்
எட்ட நிற்பதேன்?
மரபணுச்சோதனைகளால்
மரணம் கொல்லப் படும்போது
மயானக் கொல்லைகளெல்லாம்
மியூசியங்கள் ஆகுமோ?
மனிதர்களும், டினோசர்களும்
சமகாலத்தைய மிருகங்கள்!-
ஆதாம் இரண்டின் ஆராய்ச்சி கூறலாம்.
நேரெதிர் பலன்களையும்
பூமி ஒப்புக்கொள்ளும்போது
நீங்களும் ஒப்புக் கொள்வீர்கள்
-சுருங்கி வருவது பூமி மட்டுமல்ல,
மனித மனமும் தான்.
No comments:
Post a Comment
தங்களது மேலான கருத்திற்கு நன்றி!