மனித உரிமை மீறலொன்று

 -வீடியோவை எடுத்தவருக்கு விவசாயிகளும், தன்னார்வ நிறுவனங்களும் பாராட்டு விழா நடத்த வேண்டிய நேரமிது.

"அவ்வளோ பெரிய ஆளாடா நீ?"

-என கேட்டவாறே டிராக்டரிலிருந்து கீழிறக்கி தஞ்சையைச் சார்ந்த அந்த விவசாயியை அடித்து இழுத்துச் செல்கிறார் காவல்துறையைச் சார்ந்த ஒருவர்.

சட்டத்திற்குப் புறம்பாக பல்வேறு தனியார் நிதி நிறுவனங்கள் தாங்கள் கொடுத்த தொகையை திரும்பப் பெற பல அராஜகமான உத்திகளைக் கையாளுகின்றன.

அன்றாடம் நிகழும் ஆயிரக்கணக்கான நிகழ்வுகளுக்கு ஒரு எடுத்துக்காட்டாக இந்நிகழ்வைக் கொள்ளலாம்.

அதிலும் இவ்விவசாயி தான் செலுத்த வேண்டிய தவணைகளில்
8 தவணைகளுக்கு 6 தவணைகளை முறையாகச் செலுத்தியிருக்கிறார்.

அறுவடை முடிந்து மீதத்தைச் செலுத்தி விடுகிறேன் என்றும் கெஞ்சியிருக்கிறார்.

கடன் ஒன்றைப் பெற வரும் வாடிக்கையாளரை இன்முகத்தோடு வரவேற்று காபி,டீ,கூல்டிரிங்க்ஸ் என குளிப்பாட்டி, ஒரு லட்சம் கடன் தொகைக்கு ஓராயிரம் கையெழுத்து வாங்கிக் கொண்டு வழங்கும் நிறுவனங்கள் அரசாங்கத்தின் சட்டங்களை மதித்து நடக்கின்றனவா என்றால் இல்லவே இல்லை என்று தான் சொல்ல வேண்டும்.

அவசரத் தேவைக்காக பணம் பெறும் சாமானியர்கள் தவணைகளை முறையாக செலுத்தா விடில் சொல்லொனாத மன உளைச்சல்களை சில நிதி நிறுவனங்கள் ஏற்படுத்துகின்றன.

இவர்களது வட்டிக் கணக்கீட்டினை விளக்கச் சொன்னால், ஒரு பொருளாதார மேதையே மயக்கமடைந்து விழுந்துவிடுமளவிற்கு விளக்கங்களைச் சொல்வார்கள். மேலும் விபரம் கேட்டால், நாம் கையெழுத்து போட்டுக் கொடுத்த தாளை காண்பித்து மிரட்டுவார்கள்.

காவல்துறை இவர்களது சொல்படி நடக்கிறதா? இல்லை சட்டப்படி நடக்கிறதா என்பதை மக்களின் ஊடகமான வாட்சப் வீடியோ வெளிப்படுத்தியிருக்கிறது என்பதும், தேசிய மனித உரிமைகள் ஆணையம் இவ்விஷயத்தை கையிலெடுத்திருக்கிறது என்பதும், அது நாடாளுமன்றம் வரை எதிரொலித்திருக்கிறது என்பதும் பாராட்டுக்குரிய விஷயம் தான்.

என்றாலும் இது இன்னொரு சாதாரண செய்தியாக கால ஓட்டத்தில், காலத்தின் காலடியில் சிதைந்து போய்விடக் கூடாது என சாமனியர்கள் எண்ணுகிறார்கள்.

தான் உழைத்து சிறுகச் சிறுகச் சேமித்து வாங்கிய சொந்த நகையை பொதுத் துறை வங்கியில் அடகு வைத்து 3000,7000, 12000 என கடன் வாங்கும் கிராமத்துக் கடைக்கோடித் தெருவில் கதவில்லா வீட்டில் வசிக்கும் ஒரு பெண்ணின் பெயரை கதவு எண்ணோடு பத்திரிக்கைகளில் வெளியிடும் வங்கிகள், கோடி கோடியாக கடன் பெற்று திரும்பச் செலுத்தாத மல்லையா அவர்களை இத்தனை ஆண்டுகளில் ஒருமுறையாவது இப்படி வெளியிட்டிருக்கிறதா?

இதற்கு சட்டத்தில் இடமுண்டா?
தண்டிக்கப்பட வேண்டியது கடன் பெற்றவரா? வழங்கியவரா?

அன்பார்ந்த விவசாயிகளே,ஏழைகளே,சாமானியர்களே!

கைக்காசைப் போட்டு ஒரு கேமரா செல்போனையும் அதில் வீடியோ எடுக்கவும் கற்றுக் கொள்ளுங்கள்.

ஆங்காங்கே இருக்கும் இதுபோன்ற ஆயிரக்கணக்கான பாலன்களை, 'வீரர்களாக' நீங்களும் உருவாக்கலாம்.

சென்னை வெள்ளம்

அரசுப் பணியாக சென்னையில் நேற்று வரை 3 நாட்களாவது நான் இருந்திருக்க வேண்டும். தவிர்க்க இயலாத காரணங்களால் செல்ல இயலாமல் போய்விட்டது.

வராததற்காய் வருந்துகிறேன் சென்னையே..

என்னையே எனக்குக் காட்டிய நீ, இன்று உருக்குலைந்து போய் நிற்பதை நினைத்தாலே நிலைகுலைந்து போகிறேன் நான்.

சென்னை மக்களை நான் கண்டுணர்ந்தவன் என்ற வகையில் சொல்கிறேன். வீழ்ந்ததை விட பல மடங்கு எழுவார்கள். வியத்தகு வகையில் இன்னும் சில தினங்களில்.

அங்கே செல்ல முடியாவிட்டாலும் இங்கிருந்து என்னால் இயன்றவற்றை கடந்த மூன்று நாட்களாக சில குழுக்களுடன் இணைந்து செய்து வருகிறேன்.

இந்த மழை வெள்ளம் நம் மக்களுக்குச் சொல்ல வருவது என்ன?

>ஏரி,குளங்களை ஆக்கிரமிக்காதீர்கள்.அக்கிரமத்திற்குத் துணை போகாதீர்கள் என்றா?

>ஆண்டுக்கொருமுறை வடிகால்கள்,ஆறுகளை தூர்வாருங்கள் என்றா?

>பருவ நிலை மாறுகிறது என்றா?

>புவி வெப்பமயமாதல் என்றா? எல்நினோ என்றா?

>நகரங்களில் கட்டமைப்பு திட்டமிடுதல் முட்டாள்தனமாக உள்ளதென்றா?

-இவை எல்லாவற்றையும் விட மிக முக்கியமான ஒன்று உண்டு.

அது பேரிடர் மேலாண்மை.

சுமார் 10 ஆண்டுகளுக்கு முன்பு ஏற்பட்ட சுனாமி எத்தனையோ படிப்பினைகளை நமக்குச் சொல்லிப் போனது.

அதன் பிறகேனும் நாம் படித்திருக்க வேண்டும்.

அரசு, பள்ளிப் பாடப் புத்தகங்களில் பேரிடர் மேலாண்மையை ஒரு பாடமாக சேர்க்கவே 5 ஆண்டுகளுக்கு மேல் ஆனது.

இது போன்ற அசாதாரணமான சூழ்நிலையை எதிர்கொள்ள நிச்சயமாக மக்கள் அனைவருக்கும் களப் பயிற்சி அளிக்கப்பட வேண்டும்.

கயிறுகளைக் கொண்டு உயிர்காக்கும் முடிச்சினை இடுவது எப்படி? தீ,வெள்ளம், நிலநடுக்கத்தின் போது மக்கள் தங்களைக் காத்துக் கொள்வது எப்படி? உடனடியாக என்ன செய்ய வேண்டும்? என்ன செய்யக் கூடாது?-என்பன போன்றவை அவ்வப்போது மக்களுக்கு தொலைக்காட்சி,திரையரங்குகளில் காட்டப்பட வேண்டும்.

கும்பகோணம் தீவிபத்து நடந்த பின் திடீரென நாம் அனைவரும் விழித்துக் கொண்டு பள்ளிகளின் கட்டமைப்பு வசதி, தீயணைக்கும் கருவி குறித்தெல்லாம் பேசினோம்.

இன்று பெரும்பாலும் எல்லா பள்ளிகளிலும் தீயணைப்புக் கருவி இருக்கும். ஆனால் அது எங்கிருக்கிறது என்றோ எப்படி இயக்குவது என்றோ தலைமையாசிரியருக்கு தெரிந்தாலே அது பெரிய விஷயம்.

சுனாமி வந்தது. கடற்கரையோர மாங்குரோவ் காடுகள் குறித்தும், தடுப்பு சுவர்கள் குறித்தும் அதிகம் பேசினோம். மறந்துவிட்டோம்.

-எதெதெற்கெல்லாமோ ஜப்பான்,சீனா மற்றும் மேலை நாடுகளை ஒப்பிட்டுப் பேசும் நாம், இவ்விஷயத்திலும் இனியாவது அக்கறை செலுத்த வேண்டும்.

இயற்கையை வெல்ல எதுவுமில்லை எனினும் அதனிடம் கற்க நிறைய உண்டு.அதில் முக்கியமான ஒன்று முன்னெச்சரிக்கை.

Time Pass Online இல் வந்த நம்ம மீம்ஸ்

விந்தை மனம் கொண்ட மனிதர்கள்

பஸ்ல போயிகிட்டு இருக்கப்ப, திடீர்னு பஸ் ப்ரேக் டவுன் ஆயிட்டா, பரபரப்பா அதுக்குள்ள இருக்குற சிலர் மட்டும் எறங்கி என்னாச்சுன்னு அந்த பஸ்ஸையே சுத்தி சுத்தி வருவாங்க...
நேரம் ஆக,ஆக பொறுமை இழந்து போயி எல்லாருமே கீழ எறங்கி வேற பஸ்ல போகலாமா, இல்ல இதுவே ரெடியாய்டுமான்னு பேசிக்க ஆரம்பிப்பாங்க.. முடிஞ்சா ட்ரைவரையும், கண்டக்டரையும் நக்கலடிச்சோ கோவமாவோ பேசத் தொடங்குவாங்க..

ஆனா இவ்வளோ களேபரத்துக்கு நடுப்பறையும், சைலன்ட்டா ஒருத்தன் சென்டர் சீட்ல உக்காந்து தூங்கிகிட்டு இருப்பான்.

அவன மாதிரி ஆயிடுது சமயத்துல என் நெலமையும்.

எதையுமே கண்டுக்காமையும் போக முடியல. எல்லாத்தையும் கண்டுக்கவும் முடியல.

நல்லா போயிகிட்டு இருக்குற என் பஸ்ஸ, சுத்தி சுத்தி வந்து வேடிக்க பார்த்தே ஓட விடாம பண்ண நெனைக்கிறாங்க சிலர்.

-எனக்கென்னமோ, 'இந்த கடையையும்' சீக்கிரமா மூடிடுவேனோன்னு தோணுது. மறுபடியும் டைரியிலயே எல்லாத்தையும் எழுதி மூடி வச்சுப்பேன்னு நெனைக்கிறேன்.

#பீலிங் சந்தோசம்!

7 வயது குமார் ராஜ் என்ற ஆசிரியர்

குமார் ராஜ். கடந்த சில தினங்களுக்கு முன்பு பிகார் முதலமைச்சர் திரு.நிதிஷ் குமார் பங்கேற்ற ஒரு நிகழ்ச்சியில், மேடைக்கருகே நீண்ட நேரம் நின்று கொண்டு காவல்துறையினரை வெறுப்பற்றிக் கொண்டிருந்திருக்கிறான். காரணம் அவன் கையிலிருந்த அட்டை.

அதில் 'பேச வாய்ப்பு வேண்டும்'-என பெரிதாக எழுதி மேடையிலிருந்த நிதிஷ்குமார் காணும் வகையில் பிடித்திருந்ததாக செய்திகள் தெரிவிக்கின்றன.

காவல்துறையினர் விரட்ட,விரட்ட கேளாமல் அங்கும் இங்கும் ஓடியும் எங்கும் செல்லாமல் அங்கேயே நின்றிருந்திருக்கிறான்.

இதைக் கண்ட நிதிஷ்குமார் அவனை மேடை ஏறச் சொல்லி பேச வாய்ப்பு கொடுத்திருக்கிறார்.

சுமார் மூன்றிலிருந்து நான்கு நிமிடங்கள்.

நம் நாட்டில் நிலவும் கல்வி முறை குறித்து கவலையோடு பேசியிருக்கிறான்.

ஏழைகளுக்கென ஒரு வித கல்வி முறையும்,பணக்காரர்களுக்கென ஒருவித கல்வி முறையுமென ஏன் இருவிதமான கல்வி முறைகள் இங்கே பின்பற்றப் படுகிறது? இதை மாற்ற முடியாதா?

என்றெல்லாம் பேசி, இறுதியில் தான் பிரதம மந்திரி ஆகி அனைவருக்கும் ஒரே விதமான கல்வியை வழங்குவேன் என்றிருக்கிறான்.

நிதிஷ்குமார் உள்ளிட்ட மேடையிலிருந்த அனைவரும் உள்ளத்தில் அதிர்ந்து போய் இருந்தாலும், வெளியில் அதை காட்டிக் கொள்ளாமல் அமர்ந்திருந்தனர்.

குமார்ராஜ் புதிதாகவோ,பெரிதாகவோ எதுவும் சொல்லிவிடவில்லை தான்.
ஆனால் அதை அவன் சொன்ன இடமும், கவனிக்க வைத்த நபர்களும் முக்கியமானவர்கள்.
இப்படி அனைவரின் கவனத்தை ஈர்த்த குமார்ராஜுக்கு 7 வயது. அப்பா ஒரு வெற்றிலை வியாபாரி.

தேநீர் விற்றவர் பிரதமராக இருக்கும் போது, வெற்றிலை வியாபாரியின் மகனொருவன் பிரதமராக தடையெதுவுமில்லை எனச் சொல்லி அவனை வாழ்த்தியிருக்கிறார் முதல்வர்.

பேசிய வீடியோவிற்கான லிங்க் கீழே.

.Click here to watch the video

ATM இன் தந்தை காலமானார்...

நாம் அனைவரும் வங்கிக்கு சென்று நீண்ட வரிசையில் நின்று எழுதிக் கொடுத்து நெடு நேரம் செலவழித்து பணத்தை பெற போராடிய காலத்தை ஒரு முடிவுக்கு கொண்டு வந்தன இன்று தெருவுக்குத் தெரு நிற்கக் கூடிய நடமாடும் ATM எனப்படும் தானியங்கி பணப் பட்டுவாடா எந்திரங்கள்.

அவசரத் தேவைக்காக வங்கியில் பணம் எடுக்க ஒருமுறை சென்று அது பூட்டிக் கிடந்ததை கண்டு நொந்து நூடுல்ஸான ஜான் ஷெப்பர்டு பாரன், கடும் ஏமாற்றமடைந்தார். தன்னைப் போல் எத்தனை பேர் இது போல் தங்களின் அவசரத் தேவைகளுக்காக பணம் எடுக்க முடியாமல் அவதிப் படுகிறார்கள் என்பதை கண்ட அவரின் சிந்தனையில் உதித்ததே இன்றைய ATM கள்.

ஸ்காட்லாந்து நாட்டைச் சேர்ந்த திரு. ஜான் ஷெப்பர்டு பாரன் கண்டுபிடித்த முதல் ATM எந்திரம் பார்கிளேஸ் வங்கியால் லண்டனில் 1967 ஆம் ஆண்டு நிறுவப் பட்டது.

இவர் தனது 84 வது வயதில் கடந்த சனிக்கிழமை காலமானார். ஸ்காட்லாந்து நாட்டை சேர்ந்தவராயினும்,

இவர் பிறந்தது எங்கு தெரியுமா?

இந்தியாவின் ஷில்லாங்கில்!

உங்களைப் போன்றே நானும் பெருமிதமடைகிறேன்..

அன்னாரது ஆத்மா சாந்தியடைய பிரார்த்திப்போம்...

சகலரும் பாராட்டும் சமச்சீர் கல்வி

தமிழக அரசு எதிர் வரும் 2010 ஜூன் முதல் 1 மற்றும் 6 ஆம் வகுப்புகளுக்கு பின்பற்ற வேண்டிய சமச்சீர் கல்வி அடிப்படையிலான பாடப் புத்தகங்களை வெளியிட்டுள்ளது.

தமிழகத்தில் State Board, Matric, Anglo Indian மற்றும் Oriental என்று பல்வேறு வித பாடத் திட்டங்கள் நடை முறையில் உள்ளன. இது மாணவர்களின் கல்வி மற்றும் தேர்ச்சி முறையில் பலவித குழப்பங்களையும் பாதிப்புகளையும் உண்டாக்குவதாக பெரும்பாலான கல்வியாளர்களும் உளவியல் நிபுணர்களும் கருத்து தெரிவித்து வந்தனர். இவற்றை களைந்து ஒரே மாதிரியான பாடத் திட்டம் மற்றும் தேர்வு முறை தமிழக மாணவர்களுக்கு கிடைக்க வழிவகை செய்ய வேண்டும் என்ற பெரும்பாலானோரின் கோரிக்கையை ஏற்று தமிழக அரசு, சிறந்த கல்வியாளர்கள், ஆசிரியர்கள் ஆகியோரைக் கொண்ட குழுவினரை அமைத்து, வரும் கல்வியாண்டிற்காக 1 மற்றும் 6 ஆம் வகுப்பு மாணவர்களுக்கு பாடப் புத்தகங்களை வெளியிட்டிருக்கிறது.
A4 அளவு தாளில் பல வண்ணங்களில், நிறைய தேவையான அளவு படங்களுடனும், ஆங்காங்கே விளக்க குறிப்புகளுடனும் வெளிவந்திருக்கும் இப் பாடப் புத்தகங்கள் வரவேற்கப்பட வேண்டியன.

வெறுமனே வாக்கியங்களுடனோ, முந்தைய முறையிலான கருப்பு வெள்ளை நிறத்திலோ புத்தகங்கள் இல்லாதது மட்டுமல்லாமல், புத்தகங்கள் படைப்பாற்றல் கல்வி முறையில் அமைந்திருப்பது கூடுதல் சிறப்பு.

கிராமப் புற மற்றும் நகர்புற மாணவர்கள் அனைவரும் மனநிறைவு கொள்ளத்தக்க வகையில் புத்தகங்கள் அமைந்திருக்கின்றன. மேலும் புத்தகங்களை மாணவர்கள் உடல் மற்றும் உளவியல் ரீதியாக சுமை என்று கருதிவிடாத அளவுக்கு அமைந்திருப்பது கண்கூடு.

இனி ஒவ்வொரு வகுப்பிற்கும் பாடவாரியாக தனியார் தயாரித்து கடைகளில் விற்கப்படும் குறிப்பேடுகள் (Notes) விற்பனையின்றி போகும் அளவிற்கு மிக எளிமையாக ஆசிரியர், மாணவர் இருதரப்பினரும் சுலபமாக புரிந்து கொள்ளும் வகையில் இருப்பதால் பெற்றோர்கள் நிம்மதிப் பெரு மூச்சு விடலாம்.

இன்னும் ஓரிரு வாரங்களில் பாடப் புத்தகங்கள் அனைவர் கையிலும் கிடைக்கும் பொழுது வழக்கம் போல தனியார் பள்ளி நிறுவனங்கள் இந்த சமச்சீர் கல்வி புத்தகங்களை குறைகூறலாம். எந்த ஒரு புதிய செயலுக்கும் விமர்சனங்கள் எழுவது இயல்பு தான் என்று கூறி இவர்களது விமர்சனங்களை ஒதுக்கி விடாது, தமிழக அரசும் புத்தகங்களின் தரத்தை மேலும் மேம்படுத்த முன்வரும் என்று முழுமனதுடன் நம்புவோம்.

சமச்சீர் கல்வியை மாணவர்களுக்கு கொண்டுவர பல்வேறு சட்ட ரீதியான சவால்களையும், அரசியல் ரீதியான சச்சரவுகளையும் திறம்பட சமாளித்து செயல்படும் தமிழக முதல்வர் மற்றும் அமைச்சர் பெருமக்களையும் அரசின் உத்தரவினை ஏற்று அல்லும் பகலும் பல வேலைகளில் உணவு, உறக்கம் தொலைத்து புத்தகங்கள் குறித்த நேரத்தில் வெளிவர அயராது உழைத்த பள்ளிக் கல்வி இயக்குனர், தொடக்கக் கல்வி இயக்குனர், இணை இயக்குனர்கள், துறை சார்ந்த அதிகாரிகள் மற்றும் கல்வியாளர்கள், பேராசிரிய, ஆசிரியப் பெருமக்கள் அனைவரையும் பாராட்டுவோம்.